គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃព្រឹទ្ធសភា (គណៈកម្មការទី៨) ដឹកនាំដោយលោកជំទាវ មាន សំអាន ប្រធានគណៈកម្មការ និងជាអនុប្រធានគណៈកម្មាធិកាសមាគមនារីកម្ពុជាដើម្បីសន្តិភាព និងអភិវឌ្ឍន៍ បានអញ្ជើញជួបសំណេះសំណាល និងនាំយកចង្ក្រានសន្សំសំចៃថាមពល និងសារុង ក្រម៉ា ចែកជូនប្រជាពលរដ្ឋចំនួន ៣៤០គ្រួសារ ស្ថិតនៅស្រុកប្រាសាទសំបូរ ខេត្តកំពង់ធំ នាថ្ងៃអាទិត្យ ៣កើត ខែមិគសិរ ឆ្នាំម្សាញ់ ពុទ្ធស័ករាជ២៥៦៩ ត្រូវនឹងថ្ងៃសុក្រ ទី២៣ ខែវិច្ឆិកា ឆ្នាំ២០២៥ ។
ក្នុងពិធីនោះ លោកជំទាវប្រធានគណៈប្រតិភូ បាននាំយកប្រសាសន៍ផ្ដាំផ្ញើសួរសុខទុក្ខប្រកបដោយក្តីនឹករលឹកពីសម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិសង្គហបណ្ឌិត ម៉ែន សំអន ប្រធានគណៈកម្មាធិការសមាគមនារីកម្ពុជាដើម្បីសន្តិភាពនិងអភិវឌ្ឍន៍ ព្រមទាំងបានកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំគ្រប់លំដាប់ថ្នាក់ នៃស្រុកប្រាសាទសំបូរ ទទួលបានជោគជ័យគួរឱ្យកត់សម្គាល់។
លោកជំទាវបានបន្តថា ទោះបីមានសភាពការណ៍ព្រំដែនកម្ពុជា ថៃ កំពុងជួបបញ្ហាប្រឈមុខដាក់គ្នាក៏ដោយ ក៏ប្រទេសជាតិយើងនៅទទួលបានសុខសន្តិភាព ស្ថេរភាពនយោបាយ និងជីវភាពនៃការរស់នៅតែល្អប្រសើរ។ ទន្ទឹមនោះ សូមឱ្យប្រជាពលរដ្ឋទាំងអស់ជឿជាក់ទៅលើរាជរដ្ឋាភិបាលដែលមានសម្តេចធិបតី ហ៊ុន ម៉ាណែត ជានាយករដ្ឋមន្រ្តី នៃព្រះរាជាណាចក្រកម្ពុជា ក្នុងការដឹកនាំចាត់ចែងការងារគ្រប់យ៉ាង ដើម្បីថែរក្សាសុខសន្តិភាព ការពារបូរណភាពទឹកដីឱ្យបានគង់វង្ស ដោយសន្តិវិធី នៅក្នុងក្របខណ្ឌច្បាប់អន្តរជាតិ និងស្មារតីពហុភាគីនិយម។ លោកជំទាវ បានថ្លែងអំណរគុណចំពោះបងប្អូនជនរួមជាតិទាំងក្នុង និងក្រៅប្រទេស រួមគ្នាជាធ្លុងមួយសម្តែងឆន្ទៈ ដើម្បីការពារអធិបតេយ្យជាតិ បូរណភាពទឹកដី និងការពារសេចក្តីថ្លៃថ្នូររបស់ខ្មែរ ដែលនេះគឺជាកម្លាំងចលករដ៏ខ្លាំងក្លាដែលគ្មានអ្នកណាមកបំបែក និងមកជាន់ពន្លិចបានឡើយ។
អំណោយដែលបានផ្តល់ជូនប្រជាពលរដ្ឋក្នុងឱកាសនោះ ក្នុង១គ្រួសារទទួលបាន ៖ អាហារ១កញ្ចប់ ចង្ក្រានសន្សំសំចៃថាមពល១ និងសារុង១ ព្រមទាំងឧបត្ថម្ភដល់អនុសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ស្រុកប្រាសាទសំបូរនូវថវិកាមួយចំនួនផងដែរ។
ប្រភព៖ នាយកដ្ឋានព័ត៌មាន
